முன்னாள் போராளிகளை தீய வழியில் இட்டுச்செல்ல முயற்சி என்கிறார் கோத்தபாய.

புனர்வாழ்வளிக்கப்பட்டு சமூகத்துடன் இணைக்கப்பட்டுள்ள முன்னாள் போராளிகளுக்குப் பயங்கரவாதத்தைப் போதித்து மீண்டும் நாட்டில் அசாதாரண சூழ்நிலையைத் தோற்றுவிப்பதற்கு மக்கள் விடுதலை முன்னணியின் கிளர்ச்சிக்குழு முயற்சிப்பதாக பாதுகாப்பு அமைச்சு செயலாளர் கோட்டாபய ராஜபக்ஷ குற்றம் சுமத்தியுள்ளார்.
இதற்கு ஒருபோதும் இடமளிக்கப்போவதில்லை என்று அவர் திட்டவட்டமாக அறிவித்துள்ளார்.
இது தொடர்பாக சிங்கள இணைய தளமொன்றுக்கு பாதுகாப்புச் செயலாளர் கோத்தபாய ராஜபக்ஷ கருத்து வெளியிடுகையில் :
கிளிநொச்சியை வதிவிடமாகக் கொண்ட முன்னாள் போராளிகளின் வீடுகளுக்குள் பலவந்தமாகச் சென்று அவர்களுக்கு உபதேசம் வழங்க மக்கள் விடுதலை முன்னணியின் மாற்றுக்குழு முயற்சித்துள்ளது.
புலனாய்வுப் பிரிவினரின் தலையீட்டுடன் இந்த முயற்சி தோற்கடிக்கப்பட்டது. யுத்தம் காரணமாக நாட்டு மக்கள் 30 வருடங்களாகப் பல்வேறு துன்பங்களை அனுபவித்துள்ளனர்.
எனவே, மீண்டும் அவ்வாறானதொரு நிலை ஏற்படுவதற்கு ஒரு போதும் தாம் இடமளிக்கப்போவதில்லை என அவர் குறிப்பிட்டார்.
அதற்குத் தேவையான அனைத்து நடவடிக்கைகளையும் முன்னெடுப்பதற்கு தாம் தயாராகவே உள்ளதாகவும், இவ்வாறானதொரு குழு புனர்வாழ்வு பெற்ற முன்னாள் போராளிகளுடன் தொடர்புகளை ஏற்படுத்திக்கொண்டு நாட்டில் அசாதாரண நிலைமையைத் தோற்றுவிக்க முயற்சிப்பது தொடர்பில் புலனாய்வுப் பிரிவினர் தீவிரமாகக் கவனம்செலுத்தி வருகின்றனர் என்றும் கோத்தபாய தெரிவித்துள்ளார்.